Övladınız məktəbdə bullinqə (zorbalığa) məruz qalır. Onu necə dəstəkləməli və nə etməli?

I. Özünüzə diqqət yetirin və sakitləşməyə çalışın. Gərgin emosiyalar problemin həllində maneədir.

Məsələni yaxınlarınızla bölüşün, hisslərinizi adlandırın, səbəblərini özünüz üçün aydınlaşdırın.
İdman və gəzinti qəzəbin öhdəsindən gəlməyə kömək edir.
Sakit nəfəs almaq, meditasiyaya qulaq asmaq, yaradıcı və ya hər hansı monoton işlə məşğul olmaq narahatlıq hissini azaldır (təmizlik işi aparmaq və əşyaları yerləşdirmək də kömək edir).
Xəyal qurmaq, xoşbəxt anları xatırlamaq, gələcək haqqında düşünmək ümidsizlik hissini aradan qaldırır.
Həyatınızda nəzarət edə biləcəyiniz sahələri tapdığınız zaman çarəsizlik və çaşqınlıq hissi azalır.
Əgər hisslərinizin öhdəsindən gələ bilmirsinizsə, peşəkar yardım üçün müraciət edin.

II. Sakitləşib övladınıza dəstək olun.

Övladınızı diqqətlə dinləyin, onun qaşılaşdığı problemlə artıq təkbətək qalmadığını, onun yanında olduğunuzu göstərin. Bu, yaxınlıq və qayğı hissi verəcək, qurban uşağın ləyaqət hissini və özgüvənini gücləndirəcək.
Onun dərdinə şərik olun (“Bunun baş verməsi dəhşətdir!”), baş verənlərin anormal olduğunu göstərin (“Belə olmamalıdır!”), problemi həll etmək üçün hər cür səy göstərəcəyinizi söyləyin.
Vurğulayın ki, hər kəs qurbanın yerində ola bilər və günahkar qurban deyil, aqressordur. Bəzən incidən şəxs digərini alçaltmaqla, öz ağrılarını başqasına yönəltməklə öz statusunu “qeyri-sağlam” şəkildə artırmağa çalışır. Bəzən aqressor özünü başqa işlə məşğul edə bilmədiyi üçün, yalnız bu yolla əylənir.
Övladınıza deyin ki, onu incidən şəxs/şəxslər ondan reaksiya gözləyir. Onlara qarşı təmkinli davransa, onlar istədiklərini əldə etməyəcək və geri çəkiləcəklər.
Aqressorlara qarşı dura bilmək üçün mümkün variantları sınayın:

fiziki təhdid yarandıqda uzaqlaşmaq
məktəbdə baş verən hal barədə yaşca böyüklərə (sinif rəhbərinə, digər müəllimlərə, məktəb psixoloquna, direktor müavininə, direktora) dərhal məlumat vermək
həmsöhbətlər arasında orta məsafə saxlamaqla, başıuca şəkildə, sakit jestlər nümayiş etdirmək və göz təması qurmaq
“Yox!”, “Bu mənim xoşuma gəlmir!”, “Mənimlə bu cür davranmanıza/danışmağınlza icazə vermirəm!” və s. demək.

Problemi həll etmək üçün hansı addımları atmağı planlaşdırdığınızı övladınızla bölüşün, bütün hərəkətlərinizi mütləq onunla müzakirə edəcəyinizi bildirin.

III. Özünüz haqqında düşündünüz, uşağınıza dəstək oldunuz — indi məktəblə əlaqə saxlamağın və bullinqi dayandırmaq üçün birgə hərəkətləri müzakirə etməyin vaxtıdır.

Sinif rəhbəri ilə əlaqə saxlayın və konkret faktları sadalayaraq ona bullinq barədə məlumat verin.
Övladınızı qorumaq və zorakılığı dayandırmaq üçün onun tərəfindən hansı tarixə qədər tədbirlər görüləcəyi və bu hərəkətlərin nədən ibarət olacağına dair razılığa gəlin.
Razılaşdırılmış müddəti keçdikdə, övladınızdan və sinif rəhbərindən bu istiqamətdə işin necə getdiyi barədə məlumat alın.
Problem həll olunmayıbsa, məktəb direktoruna müraciət edin.
Məktəbə bullinqə qarşı xüsusi proqramdan istifadə etməyi təklif edin.