Əziz valideynlər!

Söhbət qruplarında valideynlərlə uzun-uzadı çəkən söhbətlər o qədər çox vaxt və səy tələb edir ki, bu mövzu artıq zarafat və mem mövzusu olub. Yəqin ki, çoxlarına tanışdır ki, başımız cəmi bir saatlıq nəyəsə qarışdıqda, telefonda artıq 100-200 oxunmamış mesaj əmələ gəlir! Hələ tez-tez baş verən münaqişələri demirik.

Bu bələdçi söhbət qruplarında daha rahat ünsiyyət qurmağa kömək edəcək.

ÜNSİYYƏT QAYDALARI:

• Sərhəd qoyma qaydası. Söhbət qrupu yaradarkən ünsiyyət qaydalarını müzakirə edin və onları bərkidilmiş mesajlar kimi yerləşdirin.

• Moderasiya qaydaları.  Qaydalara riayət olunmasına nəzarət edəcək və pis niyyətli iştirakçıları bloklayan məsul şəxsi seçin. Bu rahat atmosferi saxlamağa kömək edəcək. 
• Aktuallıq qaydası. Yalnız məktəblə bağlı mövzuları müzakirə edin. Əlavə məlumat diqqəti əsas məqamdan yayındırır.  
• İnformativlik qaydası. Mümkün qədər qısa və mahiyyəti üzrə yazmağa çalışın.  

Həmçinin: 

• mühüm paylaşımları dialoq pəncərəsinin yuxarı hissəsinə bərkidin;

• təkrarlanan mövzular üçün həştəqlərdən istifadə edin (#valideyn iclası, #ev tapşırığı, #tətil, #buraxılış);
• şəxsin sizin mesajınızı görməsi üçün @-xatırlatmadan (@-Fatimə,@-Səməd) istifadə edin, yaxud şəxsən yazın.

• Qarşılıqlı hörmət qaydası. Həmsöhbətlərinizlə fikirləriniz üst-üstə düşməsə belə, sakit və nəzakətli olmağa çalışın. Kobudluq və həddini aşan tənqid hamını məyus edir.
• “İkinci şans” qaydası. Qaydaların pozulması hallarında xəbərdarlıq edin və səhvi düzəltmək və/və ya üzr istəmək imkanı verin. Şəxsi söhbət qrupundan dərhal çıxarmaq lazım deyil. 
• Müstəqillik qaydası.  Mesaj sayının çoxluğu sizi narahat edirsə, telefonun səsini və ya söhbət qrupunun bildirişlərini söndürün. Mesajları sizə uyğun vaxtda oxuyun. Söhbət qrupunda sual verməzdən əvvəl cavabı bərkidilmiş mesajlarda və ya həştəq üzrə tapmağa çalışın. Bu, həm sizin, həm də digər iştirakçıların həyatını asanlaşdıracaq. 
• Savadlılıq qaydası. Mesajları savadlı yazmağa çalışın. Yazıda hər kəs xətaya yol verə bilər, xüsusən də tələsəndə. Ancaq yaxşısı budur ki, Azərbaycan dilinin yazı qaydalarına əməl edilsin.
• Müzakirə aparmaq qaydası. Fikrinizi bildirərkən nəzakət qaydalarına riayət edin, fikirləriniz başqalarının hisslərinə toxunmamalıdır. 
• Ortaq qərarların qəbulu qaydası. Bəzən ortaq məxrəcə gəlmək alınmır. Belə hallarda kompromis tapmağa və ya çoxluğun seçdiyi kimi davranmağa çalışın.

• Münaqişlərin həlli qaydası. Fikir ayrılığı qaçılmazdır, lakin onlarla işləmək olar. Bunun üçün bütün mübahisəli məqamları toplamağa və sorğu keçirməyə çalışın: seçilmiş həll üzrə sizi qane edən/etməyən nədir? Nəticələri ümumiləşdirin və bütün iştirakçılara göstərin. Bu, məsələni müxtəlif bucaqlardan görməyə, kompromis tapmağa və ən əsası emosional gərginliyi azaltmağa kömək edəcək.  
• Bullinqə (zorbalığa) qarşı mübarizə qaydası. İştirakçılardan qəsdən və müntəzəm qaydada təhqir edilməsi, ona qarşı hədə-qorxunun, etinasızlığın olması, müzakirədən kənarlaşdırılması — bullinq deməkdir. Qurban sizsinizsə, bu barədə susmamalı və bu münasibətə dözməməlisiniz. Moderatorla əlaqə saxlaya, problemi müəyyənləşdirə, müzakirəyə çıxara, qaydaları xatırlada və bullinqin baiskarlarını məsuliyyətə cəlb edə bilərsiniz. Sadalananlar işə yaramırsa, məktəb rəhbərliyi ilə əlaqə saxlaya və ya mediasiya xidmətini dəvət edə bilərsiniz.

NƏYİ ETMƏK OLMAZ:

• Ədəbsizlik, təhqir, söyüş, ittiham.
• Münaqişələri provakasiya etmək, ədavəti qızışdırmaq.
• “Şəxsiyyətə keçmək”, valideyni və/və ya uşağı neqativ qiymətləndirmək (“Siz də uşağınız kimi məsuliyyətiszsiniz!”).
• Amiranə tonda kobudluq (“Siz ümumiyyətlə danışmayın!”).
• Yersiz ümumiləşdirmə (“Siz elə həmişə …”, “Siz onsuz da heç vaxt …”).
• Spam, tədris prosesinə aid olmayan mesajlar (“Pişik itib …”, “Baharın ilk günü münasibətilə hamını təbrik edirəm!”).
• Gerçəkliyi yoxlanılmamış informasiyanın paylaşılması (“Məktəblərdə narkotiklərdən istifadə halları çoxalıb. Hamıya xəbər edin!”).

Unutmayın ki, məktəbdə siz yox, övladınız təhsil alır. Özünüzə və başqalarına hörmət edin.  Emosiyalarınıza nəzarət etməyə və onların sizi idarə etməsinə imkan verməməyə çalışın. Bullinq halları barədə dərhal məlumat verin və kömək istəyin!